ဇန်နဝါရီလ ၁၉ ရက် ။ ။ တပ်မတော်ကာကွယ်ရေးဦးစီးချုပ်က လာမည့် ဒုတိယအကြိမ်ပြည်သူ့လွှတ်တော်အတွက် တင်သွင်းသည့် တပ်မတော်သားအမတ် ၁၁၀ ဦး၏ စာရင်းကို ပြည်ထောင်စုရွေးကောက်ပွဲကော်မရှင်က စိစစ်ပြီးဖြစ်သည်။
ယင်း တပ်မတော်သားပြည်သူ့လွှတ်တော်အမတ်များ၏ အမည်စာရင်းကို ပြည်ထောင်စုရွေးကောက်ပွဲကော်မရှင်က ဇန်နဝါရီ ၁၈ ရက်စွဲဖြင့် ထုတ်ပြန်ထားသည်။
အမတ် ၁၁၀ ဦးတွင် အမျိုးသမီးစစ်မှုထမ်း နှစ်ဦးသာပါရှိပြီး ဒုတိယဗိုလ်မှူးကြီး ဒေါ်စိုးစိုးမြင့်နှင့် ဒုတိယဗိုလ်မှူးကြီး ဒေါ်စန်းသီတာခင်တို့ ဖြစ်သည်။
ရာထူးတာဝန်များအနေဖြင့် ဗိုလ်ချုပ် ၂ ဦး၊ ဗိုလ်မှူးချုပ် ၆ ဦး၊ ဗိုလ်မှူးကြီး ၇ ဦး တို့သာမက ဒုတိယဗိုလ်မှူးကြီး၊ ဗိုလ်မှူး၊ များလည်းပါဝင်ပြီး ဗိုလ်မှူးရာထူးအများဆုံးဖြစ်ပြီး ၅၀ ဦးကျော်သည်။
၂၀၀၈ ဖွဲ့စည်းပုံ ပုဒ်မ ၁၀၉ အရ ပြည်သူ့လွှတ်တော်ကို ရွေးကောက်တင်မြှောက်သည့် အမတ် ၃၃၀ ဦးနှင့် တပ်မတော် ကာကွယ်ရေးဦးစီးချုပ်က အမည်စာရင်းတင်သွင်းသည့် တပ်မတော်သားအမတ် ၁၁၀ ဦးတို့ဖြင့် ဖွဲ့စည်းထားခြင်းဖြစ်သည်။
