ဇွန် ၁၉၊ မြူးနစ်။ ။ ဘိုင်ယန်မြူးနစ်ဂန္ထဝင်ကစားသမားဟောင်း ဘက်ကင်ဘောင်ဝါက ရှဝိန်းစတိုင်ဂါကို မန်ယူအသင်းသို့ ပြောင်းရွှေ့ခြင်းမပြုရန် တားမြစ်လိုက်သည်။
ဘိုင်ယန်မြူးနစ်ကွင်းလယ်ကစားသမား ရှဝိန်းစတိုင်ဂါသည် စာချုပ်သက်တမ်းတစ်နှစ်သာ ကျန်တော့ပြီး နွေရာသီအပြောင်းအရွှေ့ကာလအတွင်း မန်ယူအသင်းနှင့် သတင်းများထွက်နေသူဖြစ်သည်။
သို့သော်လည်း အသက် ၃၀ အရွယ်ကွင်းလယ်ကစားသမား ရှဝိန်းစတိုင်ဂါအတွက် မအောင်မြင်သည့်အပြောင်းအရွှေ့ဖြစ်လာနိုင်ကြောင်းနှင့် ကစားသမားဘဝအဆုံးသတ်ခါနီးတွင် အင်္ဂလန်ဘောလုံးကစားဟန်နှင့် အဆင်ပြေအောင်ရုန်းကန်ရလိမ့်မည်ဖြစ်ကြောင်း ဘတ်ကင်ဘောင်ဝါ က ယူဆနေသည်။
"သူ့အသက်အရွယ်အရ တခြားဥရောပလိဂ်တစ်ခုမှာ အဆင်ပြေဖို့ခက်ပါတယ်။ သူဟာနှစ်ပေါင်းများစွာ သူ့ခန္ဓာကိုယ်ကို အားသွန်ခွန်စိုက်ခိုင်း ကစားခဲ့ပြီးပါပြီ။ အဲဒါက ခံနိုင်ရည်တွေကိုလျော့ပါးစေပါတယ်။ သူ့အနေနဲ့ ကစားသမားဘဝကို အမေရိကန်မှာပဲ အဆုံးသတ်သင့်ပါတယ်။ ကျွန်တော်သာသူ့နေရာမှာဆိုရင် ဘိုင်ယန်မြူးနစ်မှာ တစ်နှစ်၊ နှစ်နှစ်လောက် ဆက်နေမှာပါ။ အဲဒီအချိန်လောက်ထိကို သူအမြင့်ဆုံးစွမ်းဆောင်နိုင်ဦးမှာပါ"ဟု ဘက်ကင်ဘောင်ဝါက ဒေးလီးမယ်ရာသို့ ပြောသည်။
ရည်ညွှန်း ဒေးလီးမေးလ်
