ဇွန် ၁၈၊ မန်ချက်စတာ။ ။ မန်စီးတီးအသင်းသည် စတာလင်းကို ပေါင် ၃၅ ဒသမ ၅ သန်းကျော်ဖြင့် တိုးမြှင့်ကမ်းလှမ်းထားပြီး ယခုတစ်ကြိမ်တွင်လည်း လီဗာပူးလ်အသင်း၏ ငြင်းဆန်ပယ်ချခြင်းနှင့် ရင်ဆိုင်ရဖွယ်ရှိသည်။

အာဆင်နယ်နှင့် ရီးယဲလ်မက်ဒရစ်အသင်းတို့ကလည်း စိတ်ဝင်စားနေသည့် အသက် ၂၀ အရွယ်အင်္ဂလန်ရှေ့တန်းကစားသမား စတာလင်း၏ တန်ဖိုးကို လီဗာပူးလ်အသင်းက ပေါင်သန်း ၅၀ သတ်မှတ်ထားသောကြောင့်ဖြစ်သည်။

လီဗာပူးလ်အသင်းသည် ပြီးခဲ့သည့်တစ်ပတ်က မန်စီးတီးမှကမ်းလှမ်းလာသည့် ပေါင် ၂၅ သန်း၊ ထပ်ဆောင်းငွေ ၅ သန်းတို့ကို ပယ်ချထားခဲ့သည်။

ကမ်းလှမ်းမှုအသစ်မှာ အခြေခံအားဖြင့် ပေါင် ၃၅ ဒသမ ၅ သန်းဖြစ်ပြီး အပိုထပ်ဆောင်းငွေများဖြင့်ပေါင်းပါက ပေါင်သန်း ၄၀ နီးပါးထိရှိနိုင်သည်ဟု ဘီဘီစီသတင်းဋ္ဌာနက ဖော်ပြခဲ့သည်။

၂၀၁၀ ခုနှစ်တွင်ကျူပီအာမှပြောင်းလာသည့် စတာလင်းသည် လီဗာပူးလ်အသင်းနှင့် ၂၀၁၇ အထိစာချုပ်သက်တမ်းကျန်နေသေးပြီး တစ်ပတ် လုပ်ခ ပေါင်တစ်သိန်းဖြင့် ကမ်းလှမ်းထားသည့် စာချုပ်သစ်ကို ငြင်းဆန်ထားသည်။

လီဗာပူးလ်နည်းပြ ဘရန်ဒန်ရော်ဂျာက စတာလင်းအနေဖြင့် လက်ကျန်စာချုပ်သက်တမ်းကုန်ဆုံးချိန်အထိ အန်ဖီးလ်တွင်သာဆက်ရှိနေမည် ဟု မျှော်လင့်ကြောင်း ပြီးခဲ့သည့်လက ထုတ်ပြောထားသည်။

ရည်ညွှန်း ဘီဘီစီ